Հիշատակի խոսք. պրոֆեսոր Էդուարդ Սարգսի Ղարիբյան

Սեպտեմբերի 27-ին 74 տարեկանում մահացավ հայտնի վնասվածքաբան, բժշկական գիտությունների դոկտոր, պրոֆեսոր Էդուարդ Սարգսի Ղարիբյանը:

Է.Ս.Ղարիբյանը ծնվել է 1938թ-ի նոյեմբերի 4-ին Բաքվում, ծառայողի ընտանիքում: 1962թ-ին բժշկական ինստիտուտն ավարտելուց հետո սկսել է աշխատել Կիրովական քաղաքի 2-րդ բուժմիավորումում, որպես վնասվածքաբան: 1965թ-ին տեղափոխվում է Երևանի վնասվածքաբանության և օրթոպեդիայի ինստիտուտ և սկսում աշխատել որպես կրտսեր գիտաշխատող, հետո հետվնասվածքային բարդությունների բաժանմունքի վարիչ: Երկար տարիներ աշխատել է Երևանի պետական բժշկական համալսարանում, վնասվածքաբանության և օրթոպեդիայի ամբիոնում սկզբից որպես ասիստենտ, հետո դոցենտ, պրոֆեսոր: Միաժամանակ, 1986թ-ից ղեկավարել է «Էրեբունի» բկ-ի, 4-րդ կլինիկական հիվանդանոցի հետվնասվածքային ինֆեկցիոն բարդությունների բաժանմունքները, իսկ 1996թ-ից եղել է «Երևան» բկ-ի նույն բաժանմունքի ղեկավարը: 1974թ-ին պաշտպանել է թեկնածուական ատենախոսությունը: Իսկ հետո սկսել է զբաղվել օստեոգենեզի խթանման հարցերի ուսումնասիրությամբ: Այդ թեմային էր նվիրված նրա դոկտորական ատենախոսությունը, որը հաջողությամբ պաշտպանել է 1994թ-ին: Նա իրավամբ համարվում է ժամանակակից վնասվածքաբանության այդ կարևորագույն խնդրի ուսումնասիրման պիոներներից մեկը: Է. Ղարիբյանը մեծ ուշադրություն է դարձրել վերջույթների դիաբետիկ անգիոպաթիայի հարցերին:

Է. Ղարիբյանը ավելի քան 90 գիտական աշխատությունների, ինչպես նաև, մի շարք գյուտերի, ռացիոնալիզատորական առաջարկությունների և մեթոդական ձեռնարկների հեղինակ է: Բացի գիտամանկավարժական և պրակտիկ գործունեությունից, Է. Ղարիբյանը նաև ակտիվ հասարակական գործիչ էր. նա եղել է ՀՀ վնասվածքաբանների և օրթոպեդների ասոցիացիայի անդամ, երկար տարիներ Երևանի գլխավոր վնասվածքաբանն էր: 

2002թ-ին Է. Ղարիբյանը ընտրվել է Եվրոպայի  բնական գիտությունների ակադեմիայի (ԵԲԳԱ, Գերմանիա) իսկական անդամ: Նա բազմիցս պարգևատրվել է պատվոգրերով, ինչպես նաև ՀՍՍՀ ԺՏՆՑ-ի ոսկե մեդալով, Մ. Հերացու անվան ԵՊԲՀ-ի անվանական ոսկե մեդալով, իսկ 2002թ-ին ԵԲԳԱ-ի Էռլիխի մեդալով:

Է. Ղարիբյանը վայելել է գործընկերների, ուսանողների, հիվանդների հարգանքը:

Հարցեր, պատասխաններ, մեկնաբանություններ